Puisi Bahasa Banjar "Mangariau Naga"

(Karya Noor Aini Cahaya Khairani)

Di bawah kalas muha ari, di atas soklat sungai martapura
di sasala sari muha balai kota lawan layu kambang di subarangnya
tambangan titis siparabayaksa pambawa pitua raden samudra
nangkaya tahalang naga
maka pangeran banjar cagar diarak kuliling banua.

Mangayuh tambangan tumatan muhara ka hulu
mananjak ilung nang datang tumatan Baritu
mangariau sumangat nini datu
gasan anak cucu nang di tabing atau di banyu
tabing lawan banyu kita, urang Banjar
nang bau pudak lawan batapung tawar.

Limbah pikah ampat puluh satu pangayuh
limbah tapaluh nangkaya mangayuh jukung basauh
bakalambu ujan panas marintik, basasajian
bapakaian saraba kuning, babaras kuning pawang
bamamang ;
“ barakat aksaraku tatinggi pada ikam
ikam kada mangariau ku aku nang mangariau ikam
uiii, sirintik siribut nang basisik habang sinang
babalang-balang
napa batapa di kalurungan
kada mayukah  wadai ampat puluh satu macam
kambang laki-bini pitu macam
lampah, darah alam jalallah
nang datang matan raden Samudra
sampai kakita".

Jangan hanyut ulih banyu nang karuh
Dingsanakku, hulu masih jauh
Ayu hancap kayuh tambangan
Tampulu kita baluman kakadapan.